Nahi mujhko koi salika, main kya karu jaana
Pyaar kaise karu main tujhko, zara mujhko bhi seekhana
Aati nahi hain mujhko, mohabbat bhari batein
Main masoom bada hu, hu magar tera deewana
Main kasme nahi khata, koi wada nahi karta
Na kafir hu na mushrik hu, meri mohabbat na aazmana
Likhe jo sher teri khatir, thi unki zindagi bas itni
Tera padhna unko dil se, aur woh tera sharma jana
Musafir hu na ghar hain, na meri koi manzil
Tujhme duniya basi hain meri, tere dil me mera aashiyana
Dukhaya ho jo kabhi dil, mujhe dil se baddua de
Bas ek aadat si ban gayee thi, woh mera roothna woh tera manana
Kehte rahe tum apni, hum khoye rahe khudhi me
Aur ab sunne ko muntazir hain, meri jaan kuch to sunana
Mit gaya jo main, kya baki rahogi tum
Is mehfil ki jaan hu main, mujhe aata hain batein banana
Apne dil se sawaal karna, kya dil ka bura hain GHAYEL
Hum jawab jante hain, tere dil se hain apna dostana
Na shaoor shayri ka na lehze me mohabbat
Jama karlo kalam-e-GHAYEL, aaj har panna hain jalana
Nahi mujhko koi salika, main kya karu jaana
Pyaar kaise karu main tujhko, zara mujhko bhi seekhana
Subscribe to:
Post Comments (Atom)
No comments:
Post a Comment